Rev 18 | MTI | STEP | Dividivi mame onananewa, ne aneya da kwimin apa aig onivi yauna. Me yusiwa koka gaibu wape noiwa aupe. Eyawa meuma gumbe piyu esine.

1 Dividivi mame onananewa, ne aneya da kwimin apa aig onivi yauna. Me yusiwa koka gaibu wape noiwa aupe. Eyawa meuma gumbe piyu esine. 2 ^aNoiwa yusipamit gumbe kwaruwane.

“Aigne. Gwetoimu kokawa Babiron aigne.
Me airapu kukaeba gwe mumawa ane,
sira airapu kukaeba desirom desirom oya nog ane,
sira nenip miyot gaibuwa desirom desirom ge topaiemewa oya
nog mumawa ane.
3 Kuiyawa at sinsin igiyawa undag danapiri waineba naya.
Danapiri waineba me uinantaraki meuma.
Piyu ayapanoa mumawa me gaibu uinantaraki aya.
Piyu ega gwiruwareme igiyawa mu me uinantaraki kokawa meumawa gumbe tawara igiyawa aya.”
4 ^bMeve ne noiwa da kwimin apa wane anona,

“Iyayapan neuma.
Me gumbe yankweg dauwaya.
Me kukaeba meuma me gaibu den aya. Kukaeba meuma den auya.
5 ^cKuiyawa kukaeba meuma geradodot kwimin dog aine.
God me kukaeba meuma imug anone.
6 ^dMe ye yennewa undag atan waniya.
Me anewa gumbe gerave waniya.
Me ap meuma gumbe bidwak ane,
sira ap meuma danave me egave sira areriyag bidwag aya.
7 ^eMe eyawa membovit ane uinantaraki membovit ane.
Me anewa gumbe dawai ge danadawai desiroma waniya.
Kuiyawa me danave wape,
‘Ne kwiin arawa kwiin mina wakena. Ne kwapura onan.
Ne danadawai sira den autna.’
8 ^fMeoya kum desirom danave me kukaeba meuma me gumbe uwape.
Kukaeba meuma me yuwat bo gumbe, danadawai,
nakwai onan kumiwa me gumbe uwak iyam gumbe me ikpe onanape.
Kuiyawa God Ayapan me yusipama sira me keptete ape.
9 ^gPiyu ayapanoa mumawa me gaibu uinantaraki ag sira tawara kukaeba meuma keb ag tamiya. Mu vesin me igiviwa yaug it ge dawai me gumbe aupe. 10 Mu vesin me dawai avivi yaug a ape mu painau yokeg iruwape.

“Kukaeba uwane. Kukaeba uwane. Gwetoimu kokawa Babiron.
Gwe yusipama.
Kum koni kusi pipi danave kukaeba geuma uwane.”
11 ^hPiyu ega gwiruwareme igiyawa me gumbe iruwak dawai aupe. Kuiyawa bira da tawara muma den gwiruwatpe. 12 ⁱTawara muma me gooru, siruva, an oraiwa, keri, wape oraiwa iviwa rinen, wape burutatae, wape siruku, wape diyapam, yoma tayapam, dividivi mae erepant donawa gumbe wariyawa, sira yoma garawa kokawa, aiyan kopa garawa kokawa, aiyan garawa kokawa, gina ubeube an oraiwa maaboro gumbe wariyawa, 13 yoma da sinamon, yoma tayapama da, yoma otawa okeremewa, oira tayapama, parawa tayapama, wain, orivu oira, nakwai wiit parawa oraimina, nakwai wiit, burumakau, mae sip, mae osi, mae gumbe tuk ororiemewa, nau eme igiyawa ge iyayapan inaiinai muma. 14 Yoma magawa kwerainewa me ge imugwa anoegewa ge gungap painau aipe. Tawara oraimumuwa undag ge tawara esinewa undag inanat onanape. Mu sira den yaupe. 15 ^jGwiruwareme igiyawa mu dividivi mame me gumbe gwiruwag tawara igiyawa aya. Mu vesin dawai meumawa a ag painau yokepe. Sira mu iruwag danadawai aupe. 16 ^kMu wape,

“Kukaeba uwane. Kukaeba uwane. Gwetoimu kokawa.
Me wape puipuyu, wape ariminawa, wape burutataewa enne,
sira gooru, an oraiwa ge magamagawa kusi puipuyu enne.
17 ^lKum pipi danave tawara kokavitwa inanat onanane.”
Sira wa yumemewa undag, wa egave amomewa undag, wa egave nau emewa undag, mu iyayapan poeman egave nau emewa gaibu, painau yokeya. 18 ^mMu me igivi aup dauwaivi yaug mu kwaruwaya, “Gwetoimu kokawa mame mina da wakene go? Onan di.” 19 Sira mu atapupu kuiyowo areriyaya it ge danadawai aug wansin waya,

“Kukaeba uwane. Kukaeba uwane. Gwetoimu kokawa.
Wa boya igiyawa undag me tawara meuma gumbe tawara igiyawa aya.
Megara me kum pipi danave wakukamne.”
20 ⁿKwimin, iyakaisi igiyawa, apasoro ge propeta, gwetoimu kokawa mame oya degadega aya.
Kuiyawa yenan oya God gwetoimu kokawa mame kep tene.”
21 ^oMeve aneya yusipama an kokawa enagat aune. An me parawa danave waremewa mina koka. Aneya me poeman danave aorek wane,

“Gwetoimu kokawa Babiron me yusipamit tope aikpe.
Sira den yaupe.
22 ^pKae aap eme igiyawa, bererin toeme igiyawa,
kae nouwo upui eme igiyawa,
kae trampet upi eme igiyawa,
mu nouwa sira ge den anoa.
Nanuwo wareme igiyawa undag sira ge den yawama.
An me gumbe parawa waremewa me noiwa sira ge den anoa.
23 ^qDamempa eyawa danagap sira den ig esipe.
Vesin apan memgebip mataiwa nouwa sira den anoa.
Kuiyawa gwiruwareme igiyawa geuma mu piyu ega yusipama igiyawa,
sira at sinsin igiyawa undag dum geuma kukaeba gumbe anopipanum aya.
24 ^rSira kuiyawa propeta igiyawa, iyakaisi igiyawa ge piyu egave guriya boriruwayawa undag ganiganiyowa gwetoimu koka mame danave yaune.”